يوميات : أنا..والبنشري ..وزيت السيارة

السلام عليكم

صباح المساء

كيف الحال..والأحوال إن شاء الله بخير

اليوم الظهر كنت أتكلم مع هشوم ولد عمي وسألني عن المدونة

وقال : ليش ماتكتب يوميات كثير ؟؟

قلت : اقدر اكتب يوميات وكل يوم ، مع انه حياتي وخاصة في الرياض روتين ومافيه شئ كثير يتغير، لكن مااحب اكتب يوميات وتجي الناس تقراها وماتستفيد منها ، مجرد سرد قصصي مامنه فايده مثل بعض المدونات إلي تلاقي عليها إقبال كبير وتجي تزورها تلقاها مجرد كلام ما منه فايده يوميات فارغه ليس لها هدف أو معنى حقيقي تستفيد منه وخاصة إذا كان صاحب اليوميات بنت ، تجد إقبال كبير وردود بالعشرات يمكن احنا نحب اللقافه وعندنا حب إطلاع على حياة الناس مو لشي مجرد إنه لقافه وبنت نحب نتعرف على حياتها الشخصية.

هو ماأقتنع واعتبرها تصريفه :)

المهم جلست اليوم المغرب أفكر استغل أي شئ في حياتي اليومية عشان اكتبه وتستفيدون منه طلعت من البيت بروح للسيارة وانا امشي كنت

افكر

افكر...

طلعت السيارة..وانا افكر..افكر

شفت عداد الزيت ولا العداد واصل 4500 كيلو متر تقريبا قلت اوووه لازم أغيره ، رحت البنشر وفتحت الكبوت

طبعا سيارتي كامري 2005 سماوي دلع ;)

وقلتله: غير زيت تويوتا والسيفون حق الوكاله ماابغى التقليد

قال البنشري : زيت تويوتا ثقيل مره 20W50

قلت : وش يعني 20W50 ؟؟

قال البنشري : هذا درجة اللزوجه

قلت : وش الأحسن للسيارة ؟؟

قال : طبعا - يقولها بكل ثقة - الزيت الخفيف 10w30 احسن

قلتله : ليه؟؟

قال : شوف الكاتلوج حق السيارة مكتوب فيه كذا

عاد تعرفون عيبنا احنا العرب إذا اشترينا ثلاجة أو غساله أول شي نرميه ولا نطالع فيه هي الأوراق إلي تجي مع الجهاز ، عاد كيف السيارة مااذكر صراحه من يوم اشترالي أبويه السياره -الله يخليه ليه- إني طالعت في كاتلوج السيارة.

المهم ماعجبني كلامه وحسيت إنه ينصب عليه وقلتله حط زيت تويوتا وبس :) ، رحت فتحت الكاتلوج ، ودورت في الفهرس عن المحرك ، لقيت رسم بياني يوضح الزيت المناسب لسيارتك ويعتمد على درجة حراره الجو:

زي مانتو شايفين الزيت 20W50 ينفع في درجات الحراره من 3 درجه مئوية تقريبا إلى 38 درجة وهو الثقيل ،

اما 10W30 فهو ينفع من 4 درجات إلى -16 درجه وهو الزيت الخفيف ، وعندنا درجة الحراره مستحيل توصل -16 وفيه تنبيه يقول انه إذا حطيت زيت ثقيل للمحرك وانت في درجة حراره بارده جدا ممكن السيارة إنها ما تشتغل ، والعكس إذا حطيت زيت خفيف وانت في جو زي جونا الحار راح يطير الزيت ويتبخر ويكسب من وراك البنشري النصاب :)

فالحمدالله إني إتبعت حدسي ومانصب عليه.

ودمتم سالمين

أبوخالد